பேராசிரியர் சாலமன் பாப்பையா அவர்களுக்கு


 

தமிழின் பட்டிமன்றத் திலகம்


பேராசிரியர் சாலமன் பாப்பையா அவர்களுக்கு

கண்ணீர் அஞ்சலி


தமிழோடு வாழ்ந்தவரே

தமிழுக்காய் உழைத்தவரே

தரணியில் தமிழ்மணத்தைத்

தலைமுறைக்கும் தந்தவரே!


பட்டிமன்ற மேடையிலே

பண்போடு நின்றவரே,

பகுத்தறிவை நகைச்சுவையால்

பாங்குடனே சொன்னவரே!


சொல்லெடுத்து வாதாடி

சுவையோடு தீர்ப்புரைத்து

சொல்லுக்குள் நயம் கலந்து

சிந்தனையைத் தூண்டியவரே!


கேட்போரின் மனமெல்லாம்

கவர்ந்திழுக்கும் குரலோடு,

கேள்விகளுக்கு விடைதந்து

கலையோடு நடந்தவரே!


வாதமென்ற போர்க்களத்தில்

வன்மையின்றி வென்றவரே

வாழ்வியலைத் தமிழோடு

வழிகாட்டிச் சென்றவரே!


அறிவோடும் நகைச்சுவையும்

அழகாகக் கைகோர்க்க,

அரங்கமெங்கும் தமிழ்த் தேனை

அள்ளியள்ளிப் பருகவைத்தீர்!


மக்கள் மனம் அறிந்தவரே,

மண்ணின் மொழி தெரிந்தவரே

மாமதுரைத் தமிழின் மணம்

மாநிலமெங்கும் வீசியவரே!


இன்று மட்டும் ஏன் மௌனம்?

இனிய குரல் எங்கே போனது?

நேற்றுவரை ஒலித்த தமிழ்

நெஞ்சினிலே தேங்கியது!


நடுவர் நாற்காலி வெறுமை…

நாவும் இன்று மௌனமோ?

தமிழரெல்லாம் கண்ணீரோடு

தலைவணங்கி நிற்கின்றோம்!


உடலொன்று மறைந்தாலும்

உங்கள் சொற்கள் மறையாது

உலகம் உள்ள காலமெல்லாம்

உங்கள் தமிழ் அழியாது!


பட்டிமன்ற மேடைகளில்

பதிந்திருக்கும் உங்கள் குரல்

பல்லாயிரம் தமிழ்நெஞ்சில்

பாதையொன்றைத் திறந்திடும்!


தமிழுக்குச் செய்த தொண்டு

தலைமுறைகள் பேசட்டும்

தாங்கள் தந்த தமிழமுது

தரணியெங்கும் வாழட்டும்!


விண்ணகத்தின் வாசலிலே

வித்தகரை வரவேற்க

வான்தமிழும் மலர்தூவி

வாழ்த்துகின்ற நேரமிது!


பேராசிரியர் பெருமையே

பேச்சுலகின் செம்மலே

பாப்பையா எனும் பெயரே

பல்லாண்டுகள் நிலைக்குமே!


கண்ணீருடன் விடைகொள்கிறோம்…

கனத்த நெஞ்சுடன் வணங்குகிறோம்…

தமிழ் உள்ளம் இருக்கும் வரை

தங்கள் புகழ் வாழ்க… வாழ்க!


 கவிஞர் ரவிகிருஷ்ணா 

Comments

Popular posts from this blog

பிள்ளைகளின் வளர்ச்சியில் மனவெழுச்சி விருத்தி

கிரான்குளம் ஸ்ரீ பத்ரகாளியம்மன் தீமிதிப்பு – ஆன்மீக மகிமை